早兩日睇娛樂新聞，講到容祖兒喺內地節目公開徵婚，以宜家嘅標準當然唔係咩奇聞喇，但如果喺清末民初果陣登徵婚廣告咁就真係驚世駭俗囉，而呢個人仲要係有「國學大師」之稱嘅章太炎（即係史友話好似陳友嗰位）。

章太炎嘅原配因病過身嘅時候，章太炎仲後生，喺好友不斷勸說之下，佢喺北京《順天時報》登咗一則《徵婚告白》，上面列舉咗若干擇偶條件，包括祖籍湖南或湖北、識寫文章、大家閨秀、夫妻平等自由、丈夫死後可改嫁、夫妻不和可離婚、唔要紮腳女子等。裡面唔少擇偶標準都好容易理解，但點解章太炎連老婆喺邊度鄉下都有限制？章太炎解釋：「人之娶妻當飯吃，我之娶妻當藥用。」又話妻子最好係湖南、湖北人，其次係安徽人，北方女子就最唔適合；至於廣東人，語言不通到好似外國人咁就更加唔好。湖北人嘅語音入面保留住好多古楚方言，章太炎仲曾一度主張以武漢音嚟做漢語嘅標準音，作為研究古音嘅學者，章太炎想自己妻子識講古音都真係幾符合佢嘅性格。 

呢篇《徵婚告白》一出，引嚟唔少人譏笑，成為轟動一時嘅茶餘飯後話題。當眾徵婚喺當時簡直係聞所未聞嘅新鮮事，章太炎都可以話係中國最早登徵婚廣告嘅男人之一，不過佢嘅徵婚條件太苛刻，結果梗係無女仔理佢！好彩嘅係，章太炎最終都娶到符合佢要求嘅老婆，佢就係民國才女湯國梨喇。

圖為章太炎、湯國梨同兩位太夫人合照，原圖嚟自網絡。